ផលិតកម្ម "បារមី" ចាប់ដៃ​គូ​ជាមួយ​ក្រុមហ៊ុន​ធំ​អន្តរជាតិ​ដែល​មាន​តែ​៣ប៉ុណ្ណោះ​លើ​លោក

 តាម​ការ​ប្រកាស​រសៀល​នេះ "បារមី" បាន​ចាប់ដៃគូ​ផ្លូវ​ការ​ជាមួួ​ក្រុមហ៊ុន Warner Music Group’s ADA Asia ដោយ​ផ្ដោតទៅលើតន្រ្ដី Original Music ដែលតែងតែគាំទ្រ លើកស្ទួយ សិល្បករខ្មែរ ដែលមានទេពកោសល្យខ្ពស់។

នេះគឺជាលើកដំបូងបង្អស់​ក្នុងប្រវត្តិសាស្រ្ត ដែលមានក្រុមហ៊ុនតន្ដ្រីនៅប្រទេសកម្ពុជា បានចុះកិច្ចព្រមព្រៀង ជាដៃគូសហការ​ជាមួយនឹងក្រុមហ៊ុនអន្តរជាតិ លំដាប់ថ្នាក់ខ្ពស់ (Major Labels) ដែលមានតែ 3 ក្រុមហ៊ុនប៉ុណ្ណោះ​លើពិភពលោក។

Warner Music Group’s ADA Asia នឹងរួម​គ្នាជាមួយ "បារមី" ដើម្បីលើកកម្ពស់​តន្ដ្រី និង​សិល្បៈវប្បធម៏ខ្មែរលើឆាកអន្តរជាតិ ដែលនឹងនាំយកឱកាសល្អៗ មកផ្តល់អោយសិល្បករខ្មែរ តាមរយៈ​ការចែកចាយតន្ដ្រី និង​សិល្បៈខ្មែរ ទៅទីផ្សាអន្ដរជាតិ តាមប្រព័ន្ធឌីជីថល និងផ្ដល់អាជ្ញាប័ណ្ឌ (sync licensing) ហើយ​នាំ​ត្រឡប់​មកវិញនូវ​ថវិកាជូន​សិល្បករ នៅពេលបទចម្រៀងពួក​គេ ត្រូវ​បាន​ជ្រើសរើស​យក​ទៅ​ប្រើ​ក្នុង​ភាពយន្ត ឬ​Media នៅលើពិភព​លោក។ នេះ​បើ​តាម​តំណាង​ក្រុមហ៊ុន "បារមី"។

លោក ភីតធ័រ មន្ត្រី​ទំនាក់ទំនង​សាធារណៈ​ក្រុមហ៊ុនផលិតកម្មបារមី បាន​លើក​ឡើង​ថា "បារមី" បាន​បោះជំហានមុនគេ ក្នុងកាខិតខំលើកកម្ពស់ទេពកោសល្យសិល្បករ ជួយជំរុញអោយមាន ការរស់ឡើងវិញ​នៃសិល្បៈតន្រ្ដី ក្រោយពីរបបព្រល័យពូជសាសន៍ នៅកម្ពុជា ដែលបានបំផ្លាញវិស័យសិល្បៈទាំងមូល ដែលធ្វើឲ្យសិល្បៈតន្រ្ដីខ្មែរ ស្ទើរតែបាត់បង់។ សព្វថ្ងៃនេះ ក្រុមហ៊ុន​ផលិតកម្មបារមី មានសិល្បករ សិល្បការិនី ដែលមានប្រជាប្រិយភាពខ្លាំងដូចជាក្រុម ក្មេងខ្មែរ (Kmeng Khmer) ជាអ្នកចម្រៀង Hip-Hop, សិល្បការិនី ក៏ជាស្ថាបនិក និងជាអ្នកស្វែករកជំហានថ្មីនៃតន្ត្រី Original Music នៅកម្ពុជា កញ្ញា ម៉ម ឡរ៉ា (Laura Mam), សិល្បការិនី R&B ដែលកំពុងពេញនិយម កញ្ញា កៅ សុហ្វៀរ (Sophia Kao) និងកំពូលតារា Hip-Hop Star ប្រចាំប្រទេស វណ្ណដា (VannDa)។

កញ្ញា ម៉ម ឡរ៉ា ដែលជាសិល្បការិនី ស្ថាបនិក និង​ជានាយកប្រតិបត្ដិនៃក្រុមហ៊ុនផលិតកម្ម បារមី លើក​ឡើង​ថា ពេលនេះ តន្រ្ដីករខ្មែរ កំពុងបោះជំហានត្រលប់មករកភាពលេចធ្លោលើឆាកអន្តរជាតិវិញហើយ។ “វាគឺជាកិតិ្ដយសមួយដ៏ធំ ដែលយើងបានចាប់ដៃគូ ជាមួយក្រុមហ៊ុន ADA Asia ដើម្បីចែកចាយតន្រ្ដីខ្មែរ ទៅកាន់ពិភព លោក។ កិច្ចព្រមព្រៀងនេះ ជាជំហានមួយដ៏ធំ សម្រាប់វិស័យសិល្បៈតន្ត្រីនៅកម្ពុជា ដោយយើងនឹងនាំយកឱកាស ថ្មីល្អៗ ដែលវាអាចនឹងផ្លាស់ប្តូរវាសនាសិល្បករខ្មែរផងដែរ"។

កញ្ញា​បន្ត​ថា នៅ​មុន​ការ​បង្កើត​ឲ្យ​មាន​ក្រុមហ៊ុន "បារមី" ការចែក ចាយតន្រ្តីខ្មែរទៅបរទេសមិនដែលមាននោះទេ។ ដូច្នេះ​ហើយ នាង​ពិតជាមានមោទកភាព​ណាស់ដែល "បារមី" ​បាន​ក្លាយជាផលិតកម្មដំបូងក្នុងប្រវត្តិសាស្ត្រប្រទេសកម្ពុជា ចាប់ដៃគូជាមួយក្រុមហ៊ុនតន្រ្តីខ្នាតអន្ដរជាតិ ដើម្បីនាំយក តន្រ្ដី និង សិល្បៈវប្បធម៏ ពីកម្ពុជា​ទៅកាន់ពិភពលោក។ លោក Josh Kahn នាយកប្រតិបត្ដិការផ្នែកអភិវឌ្ឍពាណិជ្ជកម្ម នៃក្រុមហ៊ុនផលិតបារមី បានបន្ថែមថា លោក​ក៏​មាន​ក្ដី​រំភើប​រីករាយ​ដូច​គ្នា ចំពោះ​ផ្លែផ្កា​នេះ និង​រឹត​តែ​រំភើប​ដែល​អាច​រក​បាន​ដៃគូ​ល្អដែលយល់ពីសារៈសំខាន់ នៃការកសាង ហេដ្ឋារចនាសម្ព័ន្ធ នៅទូទាំងអាស៊ីអាគ្នេយ៍។ "ពួកយើងយល់ ឃើញថា នេះជាឱកាសដ៏ធំសម្រាប់តន្ត្រីរបស់យើង ហើយយើងពិតជារំភើបណាស់ ដោយយើងមានដៃគូដែលមាន គំនិត និងបំណងដូចគ្នា”។

ងាក​មក​លោក Chee Meng Tan នាយកផ្នែកគ្រប់គ្រងនៃ​ក្រុមហ៊ុន ADA Asia បានបន្ថែម​ចំពោះ​កិច្ចសហការ​នេះ​ថា ការ​ចាប់ដៃគ្នារវាង ADA Asia និង បារមី នឹង​អាចបើកទំព័រថ្មី​នៅក្នុងប្រវត្តិ​សាស្ត្រតន្ត្រី របស់ប្រទេសកម្ពុជា។ លោក​ថា "សិល្បៈតន្រ្ដី គឺគ្មានព្រំដែនកំណត់ ហើយទេពកោសល្យរបស់សិល្បករ សិល្បការិនី ខ្មែរ មានលក្ខណៈល្អពិសេស ដែលសាកសមនឹងទទួលបានការចាប់អារម្មណ៍នៅលើឆាកអន្ដរជាតិ"។ តាម​ព័ត៌មានចុងក្រោយ ក្រុមហ៊ុន ADA Asia ដែល​មានការិយាល័យកណ្តាលនៅប្រទេសសិង្ហបុរី បាន​ចាប់​ដៃគូ​ជាមួយ បារមី គឺជាផលិតកម្ម​ទី ៥ បន្ទាប់​ពី​ក្រុមហ៊ុន​មួយ​នេះ បាន​មានកិច្ចព្រមព្រៀងជាមួយ ក្រុមហ៊ុនតន្រ្តីឈានមុខគេនៅ​តាម​ប្រទេស​ដូច​ជា ប្រទេសឥណ្ឌូនេស៊ី ប្រទេសម៉ាឡេស៊ី ប្រទេសហ្វីលីពីន និងប្រទេសវៀតណាម​រួច​មក៕

អត្ថបទដើម​: Sabay News

រៀបសារឡើងវិញដោយ : Cambodia 5G